Latest Entries »

සුනාමිය නිමාවිය


නැගී සෝසුසුම්
දුක් කදුළු
අහිමි වූ ජීවිත
මව, පියා
සොහොයුරා, සොහොයුරිය
එකම වලක මිහිදන් කළ ඒ අතීතය
වලලා දමා
යළි ගොඩ නගමු දේශය
දෙවෙනි නැති
ලොව, අන්, කිසි රටකට

මේ පදවැල් ලියවුනේ මීට වසර හය කට පෙර සිදුවූ ඒ මහා ඛේදවාචකය සිහිපත් කිරීම සදහා 2005 වර්ෂයේ අම්බලන්ගොඩ ගා/ධර්මාශෝක විද්‍යාලය මගින් වේදිකා ගත කළ, සමස්ථ ලංකා නාට්‍ය තරගාවලියේ තෙවන ස්ථානය හිමිකර ගත් "සුනාමිය නිමාවිය" නම් වේදිකා නාට්‍ය සදහාය. මෙහි පද රචනය හා නාට්‍ය නිර්මාණය නීතීඥ ගෝතම ද සිල්වා කාරියවසම් මහතා විසිනි.

ඒ මහා ඛේදවාචකය හේතුවෙන් මේ පෘථිවි තලය තුල මිහිදන් වූ අපගේ සහෘදයන් හා ඥාතීන් අද දින සිහිපත් කරමු.
සියළු වාද භේද ඉවතලා නැවතත් එක්ව නැගී සිටිමු.
එය සමස්ථ මිනිස් වර්ගයාගේ හිත සුව පිණිසම වනු ඇත.

ආවර්ජනා අර්තගැන්වීම...

මෙය කවි වලින් සැදුම් ලත් දෙබසකි එහි පෙම්වතුන් දෙදෙනෙකි. පේලි හතරක් පිරිමි පාර්ෂවයටත්, තවත් පේලි හතරක් ගැහැණු පාර්ෂවයටත් අයත්ය. මෙය කෙනෙකුගේ යටිසිතේ, සිහිනයකදී මෙන් ඇතිවූ දෙබසක් ලෙසද සැලකිය හැක.

දැන් අර්තකතනය සලකමු......


යම් කිසි නොදන්නා ස්ථානයකදී ඔවුන්ගේ ප්‍රතම හමුව සිදුවේ.

දෙදෙනා එකිනෙකා දැක ගන්නේද පළමු වතාවටය.

දුටු පමණින් දෙදෙනාහට ආදරයක් ඇතිවේ.

මෙය ජන්මාන්තරගත ප්‍රේමයකි.

දෙබස අරඹන්නේ පිරිමි පාර්ෂවෙයනි.

ඔහු ඇගෙන් විමසයි.
ඔබ කව්ද?

ඇය තම ජන්මාන්තරගත පෙම්වතා හොදින් හදුනයි.
ඈ පතා ආ පෙම්වතා ඔහු බව පවසයි.

පෙම්වතාටද එසේ සිතුනත් ඔහු හදවතේ යම් භාදාකාරී හැගීමක් පවතී.
ඔහුට එම හැගීම තේරුම් ගත නොහැක.

ඔහු, පෙර භවයක, ඇයගෙන් වෙන්ව සිටියාක් මෙන් දැනේ.
ඔහු ඒ ගැන ඇගෙන් ප්‍රෂ්ණ කරයි.

ඇය එම මතකය අවදිකරන්නට අකමැතිය.
එය අදුරුය.

පෙම්වතාහට ප්‍රෂ්ණය දැනගැනුමට අවශ්‍යව ඇත.
ඔහු එම අදුරට හේතුව විමසා සිටී.

"අදුරු මතකයන්"
ඔවුන් දෙදෙන වෙන් කළ බව ඇය කියා සිටී.

මෙහි අදුරු මතකයන් යනු බොහෝ විට ඔවුන්ගේ පෙර අතීතයට අයිති, එක් අයෙකු අතින් සිදුවූ වරදක් හෝ දෙදෙනාම අතින් සිදුවූ වැරදි විය හැක. ඇයට එය පැහැදිළි කළ නොහැක.

සමහර විටක මෙම භවයේදී හෝ දෙදෙනා, දෙදෙනාගේම වැරදි හා කටුක අත්දැකීම් ඉවසා, එක්ව සිටින්නට ඇය විසින් කරනු ලබන ආරාධනයක් ලෙසට අවසන් පද පෙළ අපට සැලකිය හැක.

ආවර්ජනා

කව්දෝ නුඹේ
මා ඔබේ
මේ ලොවේ
හමු වූනේ

පෙර භවේ
හමු වූනේ
මා ඔබේ
ඔබ මගේ

නමුදු ප්‍රේමිය
කිමද වෙන්වියෙ
මා ඔබෙන්
පෙර භවේ

හිතවත,
අදුර අප වෙන් කළේ

මා ඔබෙන්
පෙර භවේ

අදුර යනු කුමකටද
නොතේරේ මට සොදුරිය
වෙන් කළේ
අප පෙර භවේ

අදුරු මතකය
ම පෙම්වත
වෙන් කළේ
අප පෙර භවේ

ඔබට සුභ නත්තලක්


ඔබට සහ ඔබගේ ආදරණීයන්ට, සාමය සතුට සහ සෞභාග්‍ය පිරි සුභ නත්තලක් පතමි.

අපි සිංහ______ලේ

සිංහල භාෂාව යනු ලෝකයේ වේගයෙන්ම නැතිවී යන භාෂාවක් යයි කිව්වොත් මා සමග බොහෝ අය අමනාප නොවේවි. ඇත්ත කතාව නම් ඒකය. අප කතා කරන භාෂාව සිංහල, අපේ මව් භාෂාව සිංහල, අප ඉපදුනේ, හැදී වැඩුනේ, සිංහලේය. ඉතින් එවන් සිංහලයක් අනාගතයේදී අපට ඉතිරිවේද?

නැත.

අපගේ භාෂාව වේගයෙන් මේ පෘතිවි තලයෙන් අතුරුදන් වෙමින් පවතී.

කල්පයක් වැනි සංසාරයේ තත්පරයක් බදු මේ ජීවිතයෙන් පසු අප මනුසත් භාවයක් ලබනා දිනකදී අප භාසාව නැතිවී ගොස් තිබේවි.

නමුත් මෙවන් භාෂාවක් තිබුනා යයි කෙනෙක් සොයා ගත්තා යයි කියමු. එසේ නම් එය දිරා පත් වූ පොතක් හෝ පත්තරයක් සොයා ගැනීමෙන් නොවේ. මිනිස් ශිෂ්ඨාචාරයට ආභරණයක් බදු වූ අන්තර්ජාලය පීරීමෙන් ඔහු එය සොයා ගනීවි.

අප භාෂාව සංරක්ෂණය විය යුතු භාෂාවකි.

එය එදා මෙදා තුල ලොව පහල වූ සර්ව සම්පූර්ණත්වයට ආසන්නවූ, විවිධ උච්චාරණයන්ගෙන් හැසිරවිය හැකි ලොව එකම භාෂවයි.

අප භාෂාව සංරක්ෂණය විය යුතු යයි මම ඉහත කීවෙමි. නමුදු එයට සුදුසු කතිකාවතක් හෝ පෙනෙන තෙක්මානයකවත් නැත. එවන් වූ යුගයක අප භාෂාව ආරක්ෂා කර ගැනීම අප සතු වගකීම සහ යුතුකමය.

නමුත් මහා කුණාටුවක් අවසන රිදී ඉරක් පායා ඇත.

සිංහලේ තරුණයන්, සිංහලෙන්, අන්තර්ජාලය නම් කුනාටු සපිරි සාගරයේ ගමන් කිරීම ආරම්භකොට ඇත.

ඔවුන්ගේ ධෛර්‍ය හා ශක්තිය මෙම කුණාටුවලට මෙල්ල කළ නොහැක.

අද අප තබනා මේ කුඩා පියවර අනාගතයේ අප භාෂාව ලොවට ඉතිරි කරනු ඇත. අවුරුදු දහස් ගණනකට පසුව හෝ අනාගත විද්වතුන් අප භාෂාව පර්යේෂණයට ලක් කරනු ඇත. මෙවන් භාෂාවක් නිර්මාණය වූ භූමිය නැතිවූ ඇට්ලැන්ටාව මෙන් සොයනු ඇත.

ඔව්න්ට එය සොයා ගෑනීම පහසු නොවනු ඇත. නුමුදු අපගේ මෙම ලිවුම ඔවුන්හට පහසුවක් වනු ඇත.

එසේ නම් සිංහලේ පෞඩ ඉතිහාසයට සිංහල බ්ලොග් කරුවන් ලෙසට අපද එකතුවී නැතැයි කියන්නේ කව්රුන්ද?

හූනියම පිටුපස විද්‍යාව


හූනියම්. බොහෝ දෙනාට ඇසු පමණින් භිය උපදවන සිතුවිලි ඇති කරන වචනයක් බව සැබෑය. ඒ එම වචනය අප නිතරම අසන්නේ කෙනෙකුට විපතක් හෝ නස්පැත්තියක් යන දෙකෙන් එකක් සිදුවූ විට පමණි. නමුදු හූනියම් යනු එසේ කෙනෙකුට වින කිරීමට යොදාගන්නා වචයක් නොවේ. මම අසා දැන ගත් පරිදි හොද දේ සිද්ධ කිරීම සදහාද හූනියම යන වචනයම භාවිත වේ. පහත දැක්වෙන හූනියම කියවන්න.

ඕං හ්‍රීං ශ්‍රී ඝනේෂාය නමඃ
ඕං වන්ද කමලනී හර හර
ශ්‍රී නාරංයන නමඃ
ඕං ඒං සර්වනේ සිද්ධි භගවතී නමඃ
ඕං ඕං මාර දේව පුත්‍ර අසුර නාරායනය නමඃ
ඕං කාමුක්තෝලි ගරුඩද්වජමුඛාය නමඃ
ඕං ශ්‍රී අවර ගිති පේසු පේසු වල්ලි අම්මා
ගිනි ගිනියේ නමඃ
නමෝ ජය ජය ජය නමඃ

ඔබ විශ්වාස කරනවාද මේ හූනියම ලියා ඇත්තේ මතක ආවර්ජන ශක්තිය (recollection power) වර්ධනය කිරීමට බව? ඔව් එය සත්‍යකි. මෙයද හූනියමකි. නමුත් මෙය තමන් හට ආවර්ජන ශක්තිය වැඩි කර ගැනීමට යොදාගන්නා හූනියමකි.

දැන් අප මොහොතක් නැවතී වසර පනහකට පමණ පෙර අතීතයට යමු. තොවිල් ගැන ඔබ අසා ඇතුවාට කිසිම සැකයක් නැත. නොවිලය යනුද හූනියමේම ශාකාවකි(derivative).

ඔබේ අච්චි හෝ සීයා තොවිල් ගැන කියා පුරසාරම් දොඩා ඇතුවාට සැකයක් නැත.

එක් අතක යකෂයා ආවේස වූ ගැහැනියකි. ඇයට කිසිදු වෙදකමක් ඵල දෙන්නේ නැත. යකෂයා ඇයට ආවේස වේ. තොවිලයක් නැටුවා පමණි ඇය සුවපත් විය. මෙසේ සිදුවූයේ ඇයි?

නැවත වර්තමානයට පැමිණෙමු. සමහරක් විට නූතන ඉංග්‍රීසි වෛද්‍යවරුන්පවා යම් කිසි විටක තොවිලයක් නැටීම අනුමත කරයි. මෙසේ කියන්නේ ඇයි? නූතන විද්‍යාවට දෙයක් මග හැරුණාවත්ද?

මෙයට සරලම පිළිතුර නැත යන්නයි.

හූනියමෙන් හෝ තොවිලයකින් වේවා ප්‍රතිකාර කරන්නේ මිනිස් සිතටයි.

මා ඉහත සදහන් කළ හූනියමේ වචන පෙළ අධ්‍යනය කරන්න. එහි කියවීමට අපහසු අකුරු ඇති බව පෙනී යාවි. ඔබ එක සැරයක් එය කියවා බලන්න. පළමු සැරයට කට තැපැලවෙන්නේ නැතිව එය කියවා ගෑනීමට ඔබට අපහසු වේවි. එය මෙවැනි දේවල් වල ලකෂණයකි.

හොදයි ඇයි හූනියමකට මෙතරම් භර අකුරු යොදා ඇත්තේ?

මා පෙර සදහන් කළ හූනියම ආවර්ජන ශක්තිය වැඩි කිරීමට යොදාගන්නා එකක් බව කීවෙමි. එනම් අප මේ හූනියම "මතුරන්නේ", මා හට මතක ශක්තිය වැඩි වෙවා, යන සිතුවිල්ලක් ද සමගයි. එනම් මහා භර අකුරු තොගයක් තුල එක් සිතුවිල්ලක් රජ කරයි. එනම් මගේ මතක ශක්තිය වර්ධණය වේවා යන්නයි.

මා මදකට තාකෂණික පැත්තට දැන් යොමු වෙන්නම්. Blog කියවන අය බොහෝ දෙනා තවමක් පරිගණක ක්ෂේත්‍රයේ බැවින් මා මේ කියන දෙය තේරුම් යාවි. අන් අය මේ කියන ටික මෙහෝතකට අමතක කරන්න.

ඔබ සමහරක් දන්නවා ඇති පරිගණක දත්ත පද්ධති (data bases). එම දත්ත පද්ධතියකින් යම් තොරතුරක් ලබා ගැනීමට ඔබ කුවරියක් ලියයි. එනම් ඒ කුවරිය පරිගණක දත්ත පද්ධතිය පීරා අවශ්‍ය result එක ඔබට ලබාදෙයි.

හූනියමෙන් සිදුවන්නේද? මේ ටිකමය. මතකය නැමති දත්ත ගබඩාව ඔබ කුවරි (query) කරයි. අප පරිගණකයට ලියනා කුවරිය මෙන් අපේ හිතට ලබාදෙන්නේ හූනියමයි. හූනියම ලස්සනට අවශ්‍ය දත්ත අප වෙත ලබා දේ. මේ උදාහරණයේදී නම් අමතකවූ මතකය ලබාදේ.

මෙහිදී සැලකිය යුතු කරුණක් වන්නේ හූනියම ලිවීමට භාවිතා කර ඇති අකෂර වින්‍යාසයයි. එම භර අකුරු යොදා ඇත්තේද ඉහත මා සදහන් කළ කාර්යයන් පහසු කිරීමටය. එනම් සිතට පණිවිඩයක් දීමටය.

හොදයි. ඒක මේච්චර සරල දෙයක් නම් ඇයි දොස්තරලත් මේක අනුමත කරන්නේ?

සරලම පිළිතුර නම් ලෙඩා සනීප කර ගැනීමය. ලෙඩක් සුවපත් වීම යනු ශරීරය මෙන්ම මානසද සුවපත් වීමය. සමහර විට කෙතරම් බෙහෙත් කළද ලෙඩය සුවපත් නොවිය හැකිය, mental factor එකටද බෙහෙත් කළ යුතුය. ඉතින් ලෙඩා තොවිල් හෙම විෂ්වාස කරයි නම් ලෙඩය නිට්ටාවටම සුව කර ගැනීමට ලෙඩාගේ මානසික පරතරය අනුව වෛද්‍ය වරයා තොවිලයක්ද තම වාර්තාවට පිටින් (බොහෝ වෙලාවට කටවහරෙන්) නිර්දේශ කරණු ලබයි. ඇත්තටම ද්‍යෛවරයා සිදුකරන්නේ මිත්‍යදෘෂ්ටික දෙයක් ලෙස පෙනුනත් එය එසේ වන්නේම නැත.

හොදයි මම එහෙනම් තවත් හූනියමකින්ම ලිපිය අවසන් කරන්නම්.

මෙය වෂී ගුරුකමකි. මෙය පාඩම් කර ගැනීම බොහෝ දෙනාට නුවණට හුරුය.

ඕං නමඃ ශිවාය ශ්‍රී හ්‍රීං
හිරනස ගර්හා රාවනා
ගෝවින්ද ගනේෂ ස්කන්ධ නමඃ
සමර්තාර්ථ සිද්ධි ඒස්වාහක්

ප.ලි : මෙහි `හ්‍රීං` ශබ්ද කරන්නේ "රීං" යනුවෙනි.


ඉහත පළ කල ඡායාරූපය උපුටා ගන්නා ලද්දේ ජීවිතය ජය ගන්න නම් අභියෝග පිළිගන්න blog අඩවියෙනි.

මව්බිමේ සරසවි දූ පුතුන් වෙත සෙනෙහසින් ලියමි | ඕස්ට්‍රේලියාවෙන් ලංකාවට ආ හසුන

ශ්‍රී ලංකාවේ සරසවිවල ඉගෙනුම ලබන සියලුම දූ පුතුන් වෙත මේ ලිපිය ලියා එවන මම ඕස්ට්‍රේලියාවේ ජීවත්වන නැන්දා කෙනෙක්‌. පසුගිය කාලයේ සරසවි අරගල උග්‍රව තිබියදී ඔබ අමතන්නට සිතුවත්, ඒ අදහස කල් දැමුවේ කෝප ආවේගයෙන් දැවෙන තරුණ හදවත් තරමක්‌ සිසිල් වීමට කාලය දිය යුතු නිසයි. මම මේ ලිපියෙන් "පුතාලා" කියා අමතන්නෙ දූලා පුතාලා දෙගොල්ලන්ටම.

මම මේ ලිපිය ලියන්නෙ ලෝකයේ ධනවත් රටක සිට ඔයගොල්ලන්ගෙ ප්‍රශ්න හා අරගල දිහා බලමින්. හැබැයි මම බලන්නෙ ධනවාදී ආකල්පයකින් නෙමෙයි. යථාර්ථවාදී ආකල්පයකින්. ඒ නිසා ආවේගශීලී මනසකින් නොව, මදක්‌ හෝ සන්සුන් කරගත් මනසකින් මේ ලිපිය කියවන මෙන් මම ඉල්ලා සිටිනවා.

මුලින්ම මම පුංචි සිදුවීමකින් කතාව පටන් ගන්නම්. පසුගිය වසරේ ඕස්ට්‍රේලියාවේ සංචාරක සමාගමක්‌ මගින් සංවිධානය කළ ශ්‍රී ලංකා සවාරියකට මමත් එක්‌වුණා. ඒ, යුද්ධය නිසා කාලයක්‌ අපට තහනම් වී තිබුණු පෞරාණික ස්‌ථාන කීපයක්‌ දැක බලා ගැනීමේ අදහසින්. සංචාරය නිමව අපි කොළඹට පැමිණියේ 2009 අගෝස්‌තු 11 වැනිදා. එදා කොළඹ නගරයේ පැවැත්වුණ රැකියා විරහිත උපාධිධාරීන්ගේ විරෝධතා ව්‍යාපාරයක්‌. අපට රැකියා දියව්" කියා රජයට බලකරමින් පදික වේදිකාවේ කරන උද්ඝෝෂණයක්‌.

අපේ කණ්‌ඩායමේ සුද්දන්ට දැනගන්න අවශ්‍ය වුණා සිය ගණනක්‌ තරුණ පිරිස්‌ රැස්‌වෙලා මොකක්‌ද මේ කරන්නෙ කියලා. මම කාරණේ පැහැදිලි කළහම මොකක්‌ද දන්නවද සුද්දොa කිව්වේ.

ඔය වැඩේ අපේ රටේ පටන්ගත්තොත් ඔක්‌කොම මිනිස්‌සුන්ට ඉන්න වෙන්නේ පාරේ. මෙහෙම කිව්වේ බංගලිදේශයේ හෝ ඉතියෝපියාවේ මිනිස්‌සු නෙමෙයි. බොහො දෙනා පාරාදීසයක්‌ යෑයි කියන ඔස්‌ටේ්‍රලියාවේ පුරවැසියො. මෙහිම ඉපිද හැදී වැඩී ඇත්ත ඇති හැටියට දකින මිනිස්‌සු. හුඟක්‌ ධනවත් රටවල යථාර්ථය තමයි ඒ.

උපාධියට - රැකියාවට කියා සංකල්පයක්‌ මේ රටවල නැහැ. අමාරුවෙන් රැකියාවකට ගියත්, විශ්‍රාම යනතුරු ඒ රැකියාවෙ රැඳී ඉන්න ලැබෙයි කියන විශ්වාසෙකුත් නැහැ. මේ රටවල රැකියා අහිමිවීමේ අවදානමත් හුඟක්‌ම වැඩියි. රැකියා ඉල්ලමින් පාරට බහිනවනම්, ඕස්ට්‍රේලියාවේ හැම මිනිහෙකුටම පාරෙ ඉන්න වෙන බවට අර සුද්දා අනතුරු ඇඟෙව්වෙ ඒකයි.

ලෝකයේ ධනවත් රටවල විශ්වවිද්‍යාල අධ්‍යාපනය නොමිලයේ ලැබෙනව කියලද පුතාලා හිතන්නෙ? එහෙම ලැබෙන්නෙ ඉතාම ඉහළ සමත්කම් පෙන්වා ශිෂ්‍යත්ව දිනාගත් අතළොස්‌සකට පමණයි. අනෙක්‌ හැම ශිෂ්‍යයෙක්‌ම මුදල් ගෙවා ඉගෙනගත යුතුයි. රැකියාවක්‌ ලැබුණු පසු ගෙවීමේ ක්‍රමයට ඔවුන්ට ශිෂ්‍යාධාර ලැබෙනවා. නමුත් ඒ මුදල අධ්‍යාපන කටයුතු සඳහා ප්‍රමාණවත් නැහැ. මේ රටවල හැම විශ්වවිද්‍යාල ශිෂ්‍යයෙක්‌ම අර්ධකාලීන රැකියාවල නිරත වෙන්නෙ ඒ නිසා.

ලංකාවෙ විතරක්‌ නෙමෙයි, ලෝකෙ හැම රටකම සරසවි ජීවිතය කටුකයි. එංගලන්තයෙ විශ්වවිද්‍යාල ශිෂ්‍ය ගාස්‌තු තුන් ගුණයකින් වැඩිකිරීමට එරෙහිව මහා ශිෂ්‍ය විරෝධතාවන් දියත්වුණු හැටි පුතාලා පසුගිය දිනවල රූපවාහිනියෙන් දකින්න ඇතිනෙ. ඒ දකිනකොටවත් ඔයගොල්ලන්ට හිතුනෙ නැද්ද ගාස්‌තු නොගෙවා සරසවි අධ්‍යාපනයක්‌ ලැබීම වාසනාවක්‌ කියල? ඒ දුර්ලභ වාසනාවෙන් මීට වඩා ප්‍රතිඵල ලැබිය යුතුයි කියල?

පසුගිය කාලයේ මෙල්බර්න් නුවර මගේ සේවා ස්‌ථානයට ඇමරිකානු උපදේශිකාවකගේ සේවය ලබාගත්තා. එකී තනතුරට අවශ්‍ය සුදුසුකම් හා පළපුරුද්ද ඇති කිසිවකු ඕස්ට්‍රේලියාවේ සොයාගන්නට බැරිවීම නිසයි ඇමරිකාවෙන් මේ කාන්තාව "ආනයනය" කරන්නට සිදුවුණේ. අද අපේ කාර්යමණ්‌ඩලය සමග සුහද වන විට අපට දැනගන්නට ලැබුණා ඇය දණහිස්‌ ආබාධයකට නොකඩවා ප්‍රතිකාර ලබන්නියක්‌ බව. මේ ආබාධයේ සුලමුල කියද්දී තමයි ඇගේ ශිෂ්‍ය ජීවිතයේ කටුක අද්දැකීම් අපට දැනගන්නට ලැබුණෙ.

මෙතැන් සිට අපි ඇය මේරි කියා හඳුන්වමු. තමන්ගෙ උසස්‌ අධ්‍යාපනයට අවශ්‍ය මුදල් සොයන්නට මේරි වයස අවුරුදු දාසයේ සිට පුරා පහළොස්‌ වසරක්‌ කම්හලක සේවය කළාලු. ටින් මාළු කම්හලක ශීත කාමරයෙහි ඇය දිගමට සේවය කර තිබෙන්නෙ. සම් මස්‌ විනිවිද යන කටුක සීතලෙන් පීඩා විඳිමින්, රාත්තල් 50 ක්‌ බරැති මාළු බඳුන් ඔසවා එහා මෙහා කිරීමයි ඇගේ රැකියාව. පුතාලා පොඩ්ඩක්‌ හිතන්න. දාසය හැවිරිදි සියුමැලි තරුණියකට ඒ තරම් කටුක රැකියාවක යෙදෙන්නට වීම මොනතරම් අසාධාරණද?

ඉතින් මේරිගේ දණහිස්‌ ආබාධය ඇතිවුණේ මේ අසාධාරණයට එරෙහිව පෙළපාලි ගොස්‌ පොලිසියෙන් ගුටිකාලහෙම නොවෙයි. උසස්‌ අධ්‍යාපනයක්‌ ලබාගැනීමේ අභිලාෂය මුදුන්පත් කරගැනීමට ඒ අසාධාරණය සමග පහළොස්‌ වසරක්‌ ඔට්‌ටුවීම නිසා. සරසවි අධ්‍යාපනයට අවශ්‍ය මූලික මුදල් සොයා ගැනීමට ඇය මුල් වසර දෙක එම කම්හලේ පූර්ණ කාලීනව සේවය කළා. එසේ ඉතිරිකරගත් මුදලින් සරසවියට ඇතුළු වූ මේරි ඊළඟට වසර ගණනාවක්‌ ගතකර ඇත්තේ අර්ධකාලීනව සරසවි අධ්‍යාපනය ලබමින් හා අර්ධකාලීනව කම්හලේ සේවය කරමින්.

අපේ දුප්පත් ලංකාවේ සරසවි සිසුන්ට පූර්ණකාලීනව අධ්‍යාපනය ලැබීමේ අවස්‌ථාව තිබුණත්, ධනවත් රටවල බොහෝ සිසුන්ට ඒ වාසනාව නැහැ. ඔවුන් සරසවියත් රැකියා ස්‌ථානයත් අතර දුව පනිමින් මහා යුද්ධයක්‌ කරමිනුයි අධ්‍යාපනය ලබන්නෙ. ඔවුන්ට දේශපාලනයේ යෙදෙන්න අවකාශ නැත්තෙ ඒ නිසා.

අර්ධකාලීනව අධ්‍යාපනය ලැබූ මේරිට සිය ප්‍රථම උපාධිය සම්පූර්ණ කරන්නට අවුරුදු හයක්‌ ගතවෙලා. ඉන් පළමු පෙළ සාමාර්ථයක්‌ ලැබූ ඇයට ආචාර්ය උපාධිය හදාරන්නට අවස්‌ථාව ලැබී තිබෙනවා. ඉතින් ඔබ හිතාවි ඇයට ඒ සඳහා ශිෂ්‍යත්වයක්‌ ලැබෙන්න ඇති කියලා.

නෑ. ශිෂ්‍යත්ව ලැබෙන්නෙ හරිම සීමිත පිරිසකට. මට ලැබුණෙ දීමනාවක්‌ විතරයි. එයින් සරසවි ගාස්‌තු ගෙවලා මගේ වියදම හොයාගන්න මම දිගටම ශීත කාමරේ වැඩ කළා. මේරි කියන්නෙ සැහැල්ලුවෙන්. ඇගේ පර්යේෂණ කටයුතු වලට දුර බැහැර යන්නට සිදුවූ නිසා ඇය එවර රාත්‍රී සේවය තෝරාගෙන. රාත්‍රිය කම්හලේ ශීත කාමරයේත්, දවාල ක්‍ෂේත්‍ර පර්යේෂණ වලත් නිරතවෙමිනුයි මේරි ආචාර්ය උපාධිය සම්පූර්ණ කරල තියෙන්නේ.

ඉන් පස්‌සෙත් අවුරුදු දෙකක්‌ මම එතන වැඩ කළා. ආචාර්ය උපාධියක්‌ තිබුණු පළියට රස්‌සාවක්‌ හම්බවෙන්න නෑනෙ.

අප්‍රමාණ දුක්‌ කන්දරාවක්‌ විඳපු මේ ගැහැණිය අද අතීතය දිහා හැරී බලන්නෙ උපේක්‍ෂා සහගතව. ඈ නිසි රැකියාවකට ගියාට පස්‌සෙ අගේ ගමන නවත්වන්න කාටවත් හැකිවෙලා නෑ. අන්තිමේ ඈ නතරවුණේ ඇමරිකාවට පමණක්‌ නොවෙයි බටහිර ලෝකයේ වෙනත් රටවලටත් නැතුවම බැරි තැනැත්තියක්‌ වෙලා.

ශීත කාමරයේ පහළොස්‌ වසරක්‌ බර වැඩ කිරීම නිසා තමන්ට උරුම වුණු ශාරීරික ආබාධය දිහා වුණත් ඇය බලන්නෙ මැදිහත් සිතින්. ඒ කම්හල මගේ ශ්‍රමය සූරා කෑවා, මාව ලෙඩෙක්‌ කළා කියලා ඇය ඔවුන්ට වෛර කරන්නෙ නැහැ. ඔවුන් තමන්ගෙ අධ්‍යාපන කටයුතු කරගෙන යන්න හැකිවෙන විදියට සේවා මුර ලබාදීම ගැන ඈ සිහිපත් කරන්නෙ කෘතවේදීව.

මේරිගේ කතාවෙන් අපේ සරසවි දූ පුතුන්ට පමණක්‌ නොවෙයි පොදුවේ ශ්‍රී ලාංකික අප කාටත් උගත හැකි පාඩමක්‌ තිබෙනවා. ජීවිතය කියන්නෙ පිරුණු බඳුනක්‌ නොවෙයි. මේ අඩක්‌ පිරුණු බඳුනේ හිස්‌ අඩ දෙස බලා සුසුම් හෙළනවාට වඩා පිරුණු අඩින් උපරිම ප්‍රයෝජන ගන්නයි අපි හිතට ගත යුතු.

නන්දා මාලනීගෙ ගීයකින් කියනවා වගේ ඔයගොල්ලන්ව තොටිල්ලේ තියා "බාලොලී- ලොලී" කියන්න නොවෙයි මම උත්සාහ කරන්නේ. කෑගසා නොඉල්ලුවොත් ලැබෙන්නෙ නැති බවට මාත් එකඟයි. ඒත් අධ්‍යාපන කටයුතු අඩාල කරගෙන කෑගසමින් සිටියාය කියා ඔබට ලැබෙන දෙයක්‌ නැති බවත් ඔබ තේරුම් ගත යුතුයි. ඔබේ අධ්‍යාපනය අඩාල වුණොත්, එහි පාඩුව මහින්දටවත්, රනිල්ටවත්, සෝමවංශටවත් නොමෙයි ඔබටමයි. ඔබ වෙනුවෙන් අනන්ත අප්‍රමාණ දුක්‌ විඳින ඔබේ මව්පියන්ටයි.

අසූව දශකයෙදී මම කළුතර දිස්‌ත්‍රික්‌කයේ ඉංගිරිය දිසා රෝහලේ සේවය කළා. මා රාත්‍රී සේවයේ යෙදී සිටි දිනයක එක්‌ අම්මා කෙනෙක්‌ පුංචි කොලුපැටියකු රෝහලට ගෙනාවා. අවුරුදු දෙකක්‌ තරම් වූ ඒ දරුවා මොකක්‌දොa දඟකාර කමක්‌ කරන්නට ගොස්‌ කකුලේ මහපටැඟිල්ලක නියපොත්ත තලාගෙන. රෝහලක දරුණු තුවාලකරුවන් දකින අපිට එය ඉතා සුළු තුවාලයක්‌. ඒත් එදා මුළු රැයම ඒ පුංචි එකා වේදනාවෙන් කෙඳිරි ගෑවා. දරුවෙක්‌ වේදනාවෙන් ඉඳිද්දී අම්මා කෙනෙකුට නිදාගන්න බැහැ. ඒ අම්මා මුළු රැයම නොනිදා පහන් කළේ දරුවා උරහිස මත හොවාගෙන රෝහල් කොරිඩෝවේ සක්‌මන් කරමින්.

තරුණ දූ පුතුන් නොසැලකිලිමත්කම නිසා අනතුරු සිදුකරගන්නා විට, ප්‍රේමය, විප්ලවය හෝ වෙනත් හේතු නිසා ජීවිත හානි කරගන්නා හැටි දකින විට මට සිහියට නැගෙන්නේ ඒ අම්මාව. දරුවෙකුගෙ නියපොත්තක්‌ වෙනුවෙන් රැයක්‌ නොනිදා පහන් කරන මවකට දරුවෙකුගෙ ජීවිතයක්‌ මොන තරම් වටිනවාද? ඔබ මේ තරම් දුරක්‌ ගෙනෙන්නට ඇය මොන දුකක්‌ විඳින්නට ඇත්ද? ඇගේ ජීවිතයට ඇති එකම බලාපොරොත්තුව ඔබ ආ කාරිය කරගෙන යහතින් ගමරට බලා ඒවි කියන එකයි. ඒ බලාපොරොත්තුව කඩ කරන එක අසාධාරණයි කියා ඔබට හිතෙන්නෙ නැද්ද? ඇය චීත්ත පොටින් හෝ ගවුම් වාටියෙන් පිසින කඳුළ සතුටු කඳුළක්‌ හෝ දුක්‌ කඳුළක්‌ කිරීමේ වගකීම ඇත්තේ ඔබ අතේ බව රත්තරන් පුතාලා අමතක කරන්න එපා.

සරසවි ජීවිතයේ බොහෝ අඩුපාඩු, කම්කටොළු තියනවා තමයි. ඔබ නොයෙකුත් අසාධාරණකම් වලට මුහුණ දෙන බවත් ඇත්ත. ඒත් එහෙම වෙන්නෙ සරසවි වල විතරක්‌ නොවෙයි. ලෝකයේ හැම තැනම ධනවාදී, සමාජවාදී හැම රටකම කොටින්ම කියතොත් සත්ව ලෝකයේ පවා අසාධාරණය පවතිනවා. මේ කොතැනත් පොඩි එකා ලොකු එකාගේ ගොදුරක්‌. අපේ රටේ සර්ව සාධාරණ සමාජයක්‌ ගොඩනැගෙන්නට දෙවතාවක්‌ම කළ උත්සාහ වලදී මොකද වුණේ? යහපත් ෙච්තනාවෙන් ඊට සහයෝගය දුන් තරුණ තරුණියන් රටට අහිමිවීම පමණයි. ඉන් පාඩු සිදුවුණේ ඒ දරුවන්ගේ දෙමාපියන්ට මිසක්‌ සටන මෙහෙයවූ නායකයන්ට නොවෙයි.

නායකයින්ගෙන් සමහරු පිටරට වලට පැනගත්තා. සමහරු ඝාතනය වුණත්, ඔවුන්ගේ දරු පවුල් වලට ආරක්‍ෂාව සැලසුණා විෙ-වීරගේ දරු පවුලට නාවික හමුදා ආරක්‍ෂාව සැපයුනා. ඒ දියණියක්‌ මෑතකදී විවාහ වුණ බවකුත් මම පුවත්පත් වල කියෙව්වා. ගමනායකගෙ දරු පවුල එංගලන්තයේ ආරක්‍ෂාව පැතුවා. ඔහුගේ දියණිය අද එහි වෛද්‍යවරියක්‌.

සටන මෙහෙයවූ ප්‍රධාන නායකයන් දෙදෙනාගේ පවුල් වල අයගේ තත්ත්වය එසේ වෙද්දී, සටනට යන ගමේ කොල්ලන්ට ගල්කටස්‌ තුවක්‌කුවක්‌ හදා දුන් කම්හල් බාස්‌ට මොකද වුණේ? "ප්‍රා" සංවිධානයෙන් ඇවිත් බාස්‌ට වෙඩි තියා පැල් කොටේට ගිනි තිබ්බාම ඒ දරු පවුල සීසීකඩ ගියා. ඔවුන්ටත් එංගලන්තයෙ දේශපාලන රැකවරණ ලැබෙන්න ඇති කියා ඔබ හිතනවද?

සටන් වලත්, දේශපාලනයෙත් හැටි එහෙමයි දරුවනේ. නායකයන්ට වරදින්නේ නැහැ. ඉතිහාසය පුරා හැමදාමත් වැරදුණේ පොඩි එවුන්ට. තරුණ හිත්වල ඇති මානව හිතවාදී ගුණය, තරුණ ලේ වල උණුවන ගතිය. ඒ වගේම තරුණ ජවය වැරදි විදිහට යොදාගන්න මිනිසුන්ගෙන් ප්‍රවේසම් වෙන්නයි ඔබ බුද්ධිමත් විය යුතු. ඔබේ අරමුණු යහපත් බව ඇත්ත. ඒත් යහපත් අරමුණක්‌ උදෙසා ඔබ අයහපත් මාර්ගයක යවන්නට කවුරුන් හෝ උත්සාහ කරනවා නම්, ඒ අයගෙන් ප්‍රවේසම් වන්න.

වෛද්‍යවරයකු වීමේ පෞද්ගලික අරමුණ පසෙක තබා සාධාරණ සමාජයක්‌ ගොඩනැගීමේ පොදු අරමුණ වෙනුවෙන් කැපවූ ත්‍රිමාවිතාන ශිෂ්‍යයා ඔබ දන්නවා නේද? ඔහුට හිමිවුණේ පරාළ ඇණෘ අහිමි වුණේ ජීවිතය. එහෙත් මානව දයාවෙන් හෙබි ඒ අහිංසක දරුවා විප්ලවය වෙනුවෙන් පත්‍රිකා බෙදන්නට පොළඹවා ඔහු දැතේ මිට මොළවාගෙන සිටි වාසනාව ඔහුට අහිමි කළ නායකයන් සමහරක්‌ තවමත් ජීවතුන් අතර, තවත් සමහරුන්ගේ දරුවන් අද වෛද්‍යවරු. ඔහුගේ ඝාතනය සම්බන්ධව උසාවියෙන් දඬුවම් ලැබූ අය අද ඇමැතිවරු. අන්තිමට බලනවිට වැරදුණේ කාටද?

ත්‍රිමාවිතාන ජීවත්ව සිටියා නම්, ඔහු අද විශේෂඥ වෛද්‍යවරයෙක්‌. රටේ දුප්පත් ජනතාවට විශාල සේවයක්‌ කරන ජීවකයෙක්‌. වාසනාවන්ත බිරිඳක්‌ හා සුරතල් දරු පැටවුන් ඉන්නා ආදරණීය පියෙක්‌. තරුණ ජීවිතයක්‌ අඳුරට වැටෙන විට නැති වන්නේ මේ හැම දෙයක්‌ම. ඔබට අනාගතයක්‌ නැති බව කියමින් ඔබ නැති භංග කිරීමට අර අඳින දේශපාලකයන්ගෙන් ඔබ ප්‍රවේසම් විය යුතු ඒ නිසයි.

මේ කටුක සත්‍යය තේරුම් ගැනීමට ඔබ සියලු දෙනාට ශක්‌තිය, ධෛර්යය හා බුද්ධිය ලැබේවායි මම ආදරයෙන් ප්‍රාර්ථනා කරනවා. ඔබ අදහන ආගමේ නාමයෙන් ඔබ සැමට යහපතක්‌ම වේවා!

ශ්‍රියානි පෙරේරා

Source : http://www.divaina.com/2010/12/12/feature12.html

Hoping For a Better Tomorrow

I came across this kid who sells patties to support his family near a supermarket, Mirihana. He's in grade 5. Everyday after school he sells patties till late night. His father is a labourer and he has two sisters.

Made me think how unfair life is. Some get everything handed to them. Some have to fight for it. And maybe that makes them better humans.

දුක සතුට දුක ඝන අදුර


වේදනාව පොදුවූ දිනෙක
අප අතරේ පාව ගොසින් 
සතුටක් ලෙස යළි ඉපදේ

පැදකුම

දෛවය නම් තුන්මංසලේ සිටිමි
අනිත්‍යතාවයේ ඇවිද ආවෙමි
සිනහවේ පහස විදින්නට
සුසුදු මලක් දැකුමට කැමැත්තෙමි

SPIN



සැවොම සතුටු කිරීම කළ නොහැක්කකි.

Take No Action

In The Peek Of Happiness            Take No Action
In The Peek Of Anger                  Take No Action

සුන්දර නුවර එළිය සහ හෝර්ටන් තැන්න

නුවරඑළිය ගැන කතා කරන විට ඉබේටම වාගේ සිහියට නැගෙන්නේ සුන්දර දිය ඇලි, ගස්කොලන්, සුන්දර කදු පන්ති, මීදුම වැනි මනස කරදරකාරී ලෝකයෙන් මොහොතකට මුදා හරින දර්ශන පෙලකි. සමහර විට අප කුඩා කාලයේ පාසල් කරන විට නුවරඑළිය පිළිබද රචනාද ලිව්වා ඔබ අප සෑම දෙනාටම මතක ඇතුවා නිසැකය. ඒ නුවරඑළිය යනු කුඩා කල සිටම අප සිත්ගත් ප්‍රදේශයක් වීමමය. කුඩා කළ කුඩා ජර්සියක් හැද පැළදගෙන සීතලේ පාර තොටේ ගමන් කිරීමට කැමැත්තක් දැක්වූ බව කුඩා කළ නුවරඑළියේ ඔබ සංචාරය කර ඇත්නම් මතක ඇතුවා නිසැකය. අපි කුඩා කාලයේ සිටම නුවරඑළිය වැනි පළාත් වල සංචාරය කිරීමට දැඩි අශාවක් දැක්වූවෙමු. අද ද නුවරඑළිය ගැන සිහිපත් කරන විට ඒ හැගීම තමන්ගේ ඇගට කාවැදී අවසන්ය. පහත රට සිටින අපට එතරම්ම එවන් පළාත ඇති අසිරිය කියා නිම කළ නොහැක. ඉන් අප ලබන වින්දනය අන් කිසිවකින් අප ලබන සතුටකට සම කළ නොහැක.
නුවර එළිය ගැන කථා කරන විට අපහට සිහිගැන්වෙන තවත් ස්ථානයකි හොර්ට්න් තැන්න. හොර්ට්න් තැන්නට දැන් දැන් දෙස් විදෙස් සංචාරකයන්ගේ පැමිණිම වැඩි වී ඇත. මෙයද ශ්‍රීලංකාවේ සංචාරක ආකර්ෂණය දිනා ගත් සුන්දර ස්ථානයකි. වර්තමානයේ සංචාරකයන් හෝර්ටන් තැන්නට පැමිණෙන්නේ හුදෙක් දවසක පාගමනක් ගොස් නැවත හැරීයාමට නොවේ. වර්තමානයේ හෝර්ටන් තැන්න තුල සංචාරකයන් සදහා විවිධ වූ ක්‍රියාකාරකම් කිරීමට පහසු කම් සපයා දී තිබේ.
දැන් දැන් හොර්ටන් තැන්නේ සංචාරය කරන සංචාරකයන් සදහා කදවුරු බැදීම‍ට ස්ථාන නිර්මාණය කර දී තිබේ. මෙය අද දින හොර්ට්න් තැන්නට ප්‍රභල සංචාරක ආකර්ශණයක් වී පවතී. හොර්ට්න් තැන්නේ රාත්‍රීන් කිහිපයක් ගතකරීමට ඔබටත් කැමැත්තක් තිබෙනවාද? එසේ නම් ඔබ හට අවශ්‍ය පහසුකම් දැන් එහි නිර්මාණයවී පවතී. හෝර්ට්න් තැන්නේ රාත්‍රීන් කිහිපයක් කදවුරු බැදීම සංචාරක ඔබ සැම දෙනාටම තවත් එක් සුන්දර අත් දැකීමක් වනු ඇත. කදවුරු බැදීම සදහා ස්ථාන තුනක් තිබේ. එක කදවුරු බිමක් දින දෙකක් වැනි කාලයක් සදහා වෙන් කර ගැනීමට වැය වන්නේ රුපියල් පන්දහසක් වැනි මුදලකි. මීට අමතරව එය අදාල වන්නේ පහලොස් දෙනෙකුගෙන් සමන්විත සංචාරක නඩයකටය. ඉතින් ඔබත් සුන්දර නුවරඑළිය සහ හොර්ට්න් තැන්නේ දින කිහිපයක් ගත කිරීමට කැමති නම් දැන් ඒ සදහා ඉඩකඩඩ වෙන්ව පවතී.

උඹට සුභ අනාගතයක් චන්දිමාල්

ඇත්තටම කවුද මේ චන්දිමාල්. අර එහා ‍ගෙදර මල්ලිද නෑ.... කොහෙද පිස්සුද අර අල්ලපු ගෙදර අංකල් නේද, හපෝ නැහැ, මේ චන්දිමාල් කිව්වේ අපේ රටේ අළුත්ම අළුත් ක්‍රිකට් තරුවටයි.
අද අප ශ්‍රී ලංකා ක්‍රිකට් කණ්ඩායමේ නැගී එන තරුවක් වන දිනේෂ් චන්දිමාල් ගැන මම දන්නා ප්‍රමාණයෙන් ටිකක් සදහන් කිරීමට කැමැත්තෙමි.
අපේ අම්බලන්ගොඩ කොල්ලන්ට නම් ඉතින් ඔහුගේ නම දිනේෂ්, හැබැයි අද වන විට ලංකාවේ හුගක් ‍ක්‍රිකට් රසිකයන්ට නම් ඔහුගේ නම චන්දිමාල්. මා ඔහු ඇසුරු කර නැතත් මෙහිදී මා පවසා සිටිය යුතු කරුණු කිහිපයක් ඇත. ඉන් ප්‍රධාන වන්නේ දක්ෂතාව හා වාසනාව යන්නයි.
මා පෙර සදහන් කළ පරිදි ඔහු මා පාසල් කරන කළ අපේ විද්‍යාලයේම මා වියේ පසුවූ සමකාලීන සිසුවෙකි. පසුව ඔහු මගේ මතකය නිවැරදිවේ නම් මා දහය වසරේදී හෝ එකොලහ වසරේදී ක්‍රිකට් පිළිබදව දැක්වු අති විශිෂ්ට කුසලතාව හේතුවෙන් කොළඹ ආනන්ද විද්‍යාලයට ඇතුලත් වීමට අවස්ථාව ලැබුනි.
මා මගේ පංතියේ මිතුරෙකුගෙන් ඔහුගේ ඉතිහාසය පිළිබදව දැන ගතිමි. ඉතා දුප්පත් පවුල් පසුබිමක් ඔහුට තිබූ බව මා දැන් පවසන්නේ කිසිදු පැකිලීමකින් තොරවයි ඊටත් වඩා ක්‍රිකට් වලට අපේ රටේ කොතැනකින් හෝ කිසිදු තරාතිරමකින් තොරව දක්ෂයා ආදේෂ වන බව පැවසීමටයි.
ඔහුගේ ක්‍රිකට් ජීවිතයේ ආරම්භයත් මහ පුදුම කතාවකි. එය උදාවූයේ කල්‍යාන මිත්‍ර ආශ්‍රය නිසා යයි මම සිතමි. එසේ මා පවසන්නේ මා හට මේ විස්තරය පැවසු මගේ යහළුවෙකු නිසයි. මගේ මිතුරා ද එදා ක්‍රිකට් පිටියේ සිටියා නම් අද වන විට චන්දිමාල් මෙන්ම ඔහුද ජාතික තලයේ වැජබෙන ක්‍රිකට් තරුවක් වන බව මා විශ්වාස කරනා නිසයි. අද වන විට මා මිතුරා විශ්ව විද්‍යාලයේය, ඔහුගේ මිතුරා චන්දිමාල් අද ලංකාවටම ආඩම්බරයක් වූ ශ්‍රී ලංකා ක්‍රිකට් සංචිතයේය.
ඉතින් මට දිනේෂ් ගැන විස්තර පැවසු පෙර සදහන් කළ යහළුවා කුඩා කළ දිනක අපේ ගම් ප්‍රදේෂය‍ට ඉතාමත්ම සමීප “වැල්ල”, පෑගීමට “තනිවම” ගොස් සිටි අවස්ථාවක චන්දිමාල් ද වැල්ලේ බෝල ගසමින් සිට ඇත. මගේ යහළුවා එවිට අප පාසලේ ක්‍රිකට් සෙල්ලම් කරමින් සිටි කාල වකවානුවකි. දිනේෂ් වැල්ලේ බෝල සෙල්ලම් කරමින් සිටිනා දුටු මා මිතුරා “යමං බං ක්‍රිකට් ගහන්නැයි” කියා ඔහු ඇදගෙන එදා අප පාසලේ ක්‍රිකට් සෙල්ලම් කරන්නට එක් කරගෙන ගොස් ඇත. එදා නම් ඔහු අනාගතයේ තමා දිදුලන ක්‍රිකට් තරුවක් වේ යයි සිහිනෙන්වත් නොසිතන්නට ඇත. අද ඔහු නතර වී සිටින්නේ අපේ ජාතික ක්‍රිකට් කණ්ඩායමෙහිය.
මට මේ ලිපිය ලිවීමට සිත්වූයේ අද දින ලංකාදීප පුවත්පතේ පලවූ “ලෝක කුසලාන සංචිතයේ පිතිකරුවන් 9 දෙනෙකු සංගක්කාර හදුනා ගනී” යන සිරස්තලය යටතේ පලවූ ලිපිය තුල දිනේෂ්ගේ නම ද ඇතුලත්ව තිබෙනු දුටු විටය.
මීට අමතරව අද දින අප ක්‍රිකට් සංචිතයේ විශිෂ්ටයන් අතර සිටින උපුල් තරංග ද එවන් එක් අපේ ගම් ප්‍රදේෂයෙන් කරලියට පැමිණි කෙනෙකි.
මෙහිදී දිනේෂ් චන්දිමාල් ගැන වැඩිදුරටත් දෙයක් කියන්නට තිබෙනවානම් කියන්න තිබෙන්නේ, “ඔහු” අද දින අපේ ක්‍රිකට් කණ්ඩායමේ අනාගත නායකත්වයට පවා සුදුසුකම් සපුරා තිබේ යන්නයි.
ඉතින් දිනේෂ් උඹට සුභ අනාගතයක්.

ඒ කාලේ අපි මේ කාලේ

අගෝස්තුව කිව්වාම සමවයෙස් අපි හැම දෙනාටම ඇග කිළිපොලා යන මාසයක් වන බැව් නම් සැබෑව. ඒ අගෝස්තු මාසය සැබෑම විභාග මාසයක් වීමය.
මේ දින වල මම අධ්‍යාපනය ලබන ආයතනයේද අප උගෙනගත් විෂයයන් සදහා විභාග පවත්වයි.
ඉතින් විභාග ගැන කථාකරන විට අපගේ මතකයට නිතැතින්ම නැගෙන්නේ ලෙවල් වර්ග දෙකකි. නමුත් අප සමවයසේ බොහෝ දෙනෙකුට අමතකව තිබෙන ශිෂයත්වය පැවැත්වුනේද මේ වාසනාවන්ත මාසය තුලදී බැව් ඊයේ රූපවාහිනී ප්‍රවෘත්ති නැරඹු මට සිහිපත් විය.අපේ ජීවිත හොදින් හෝ නරකින් විභාග සමත් කරවා ඇත. නමුත් සැමටම සමාර්තයක් ලැබී ඇත.
අපගේ ජීවිත මේ විභාග දෙකෙන් පසු හැරුනාවූ දිෂාව වර්තමානයේ අප අත් විදිමින් සිටින්නෙමු. ඒ කාලේ සිටි අපේ මිතුරන්ගේ, දැන් සිටිනා අප මිතුරන්ගේ, පුද්ගලිකව අපගේ, ජීවිත අංෂක 180 ක කෝණයකින් හැරවීමට මේ කියන විභාග සමත් වී ඇති බව නම් සැබෑය.
මා ඉගෙනුම ලබන ආයතනයේ අප සදහා පැවැත්වු වාර විභාගය නම් අද දින නිමා විය. මාගේ එක් මිතුරෙකුට අනුව නම් එක විෂයක් නිම වීම "ඩිංගිත්තක්" නිවන් දැකීමකට සමානය.

ඇත්තටම මොනවද මේ අපට එපා කරවපු විභාග?

ඔබ දැන් හිතන විදියට ඒ කාලේ විභාගයකට මුහුන දෙන්න තිබුනෙ කොහොමද?

මහ ලොකු විභාග නිමකළ “ඔබට” ඒ නිම කළ විභාග ගැන දැන් දැනෙන්නෙ කොහොමද?

ආයෙමත් එහෙම විභාගයකට උත්තර ලියන්න කිව්වොත් උත්තර ලියනවද?

වඩාත්ම භයානකම විභාෙග් ඔබට අනුව ෙමාකක්ද?

මෙහිදී මා ගිය වසෙර් ඒ මාහා ඒ ලෙවල් විභාගයට ලියූ හැටි සිහිපත් වේ.ඇත්ත වශයෙන්ම මේ මාසය ගිය අවුරුද්දේ වගේම පිරී පැවතුනේ විභාග විලින්ම පමණක් නොවේ.ක්‍රිකට් වලින්ද අඩුවක් පාඩුවක් නැතිවම පිරී පැවතුනි.
ඉතින් කොල්ලෙකුගෙ චිත්ත සන්තානය ඒ වෙතද ඇදීයාම මොහොතකටවත් අමතක කළ නොහැක. ඉතින් ඒ ගැන අප දෙමාපියන්නම් තේරුම් ගත්තා නොවේ.
නමුත් ඉතින් අද වන විට මා ඇතුළු මෙය කියවන මගේ බොහෝ මිතුරු මිතුරියන්ට මොකක්දෝ විච්ඡුර්ණ ආ‍ලෝකය විහිදුවන පෙට්ටියක් ඉදිරිෙය් කොදු ඇට පෙල කඩාගෙන වැඩ කිරීමට නම් සිදුවී ඇත.

අහෝ මෙසේ ගොනුන්සේ වැඩ කිරීමට සිදුවූයේ විභාග නිසා ලැබුන කර්ම ඵලයක් පඪිසන් දීමෙන්වත්ද?

මේ දේවල් ගැන අප නොදුටු තවත් පැත්තක් තියෙනවද?

ඒ මොනවාද?

අප පසු කළ විභාග පිළිබද ඔබට දැන් දැනෙන අදහස් කවෙර්ද යන්න දැන ගැනීමට කැමැත්තෙමි.සමහර විටක මේ ගැන අදහස් දැක්වීමට බොහෝ දෙනා ඇගිලි ගනිමින් සිටියා විය හැකිය. සමහර විට ‍මේ පිළිබද‍ව විවෘත්තව අදහස් දැක්වීමට ස්ථානයක් නොතිබුනා විය හැකිය. එයත් එසේ වීම් නම් මා විසින් අප සිංහල බ්ලොග් ඉතිහාසයේ පළමු වතාවට විභාග ගැන කතිකාවතක් ආරම්භ කළෙමි.මෙය ඉදිරියට පවත්වාගෙනයාම අප සැමගේ වගකීමයි.ඔබගේ මතය ලියා දැක්වීමට පසුබට නොවන්න. සමහර විටක ඔබගේ අදහස් තවත් වෙනත් දිශාවක කතිකාවතක් ආරම්භ කිරීමට තරම් උත්පේ‍රරකයක් විය හැකිය.

මෙය වැඩිහිටියන්ගෙන්ද ඔවුන්‍ගේ මතය විමසීමට අවස්ථාවක් කර ගනිමි.

ඔබ සිතන විදිහට ඔබගේ දුව හෝ පුතා විභාගයට හොදින් මුහුණ නොදීමට හේතු වුනේ කුමක්ද?

සමහර විට බොහෝ දෙනෙකුට පුද්ගලිකව කරුණු කාරණා මීට බොහෝ කලකට පෙර දැනී ඇතුවා විය හැකිය. සමහර විටක එම මතය ඔබ විසින් තවත් කෙනෙකුට නොපැවසුවා ව්ය හැකිය, එවන් වූ අදහසක් ඇත්නම් "කෙමන්ටුවක්" දමා අන් අයත් සමග බෙදා හදා ගැනීමට මෙය හොද අවස්ථාවක් කර ගන්න. ‍මේ ගැන ඔබේ අදහස් දැන ගැනීමට කැමැත්තෙන් සිටිමි.

මගේ කාලය ආරම්භ වූ වගයි.

මම නමින් හිෂාන් මෙලංග. දකුණු පැත්තෙ විස්තර කරල තියෙන පරිදි මම තවම අධ්‍යාපනය ලබනව. මීට පෙර බ්ලොග් අඩවි කිහිපයක් මා සකස් කර තිබුනත් මගේම නමින් බ්ලොග් අඩවියක් නොතිබීම ගැන මා සිතා බැලුවා. එහි ප්‍රථිපලයක් වෂයෙනුයි "මගේ කාලය" අද පටන් ගත්තෙ. ඉතින් මේ බ්ලොග් එකෙන් මාත් එක්ක කථා කරන්න කැමති අය "කමෙන්ට්" එකක් එහෙම දාල බලන්න.
මම මේ බ්ලොග් අඩවිය හරහා මගේ ජීවිතේ ගැන, මගේ අත්දැකීම් ගැන, මගේ වටපිටාව ගැන ඔක්කොටම වඩා "මගේ කාලය" ගැන ලියන්න බලාපොරත්තු වෙනව.
සිංහලෙන් බ්ලොග් ලිවීම දැන් අන්තර්ජාලයේ අළුත් දෙයක් නොවුනත්, මමත් එක්ක "මගේ කාලය" බෙදාහදා ගන්න ඔය අයට නම් අළුත් අත්දැකීමක් වේවි.
ජීවිතය ගෙවෙන හැටි රස විදිමු, මිතුරන් ගොඩනගා ගනිමු, මගේ කාලය අත්විදිමු.
මෙය කියවන ඔබ හට මගේ ආචාරය.